طريقك الى الامان المالي

By | 6:11 م 2 comments

الطريق الى الأمــآن المــآلــي



صباحكم ومسائكم راحة بــآل

هالموضوع لك سواء كنتي عزباء أو متزوجه وسواء كنتي مسئوله عن عائله لوحدك أو معك شريك

المهم  بالبدايه لازم نعرف ان البخل سيئة واكثر صفه ممكن مانتقبلها من الناس .
وبنفس الوقت الاسراف شي سئ  يعني صحيحالانسان  المفروض تظهر نعمة ربي عليه ونشكره
لكن ماتوصل لمرحلة الاسراف والتبذير
وراح يوضح لكم معنى كلامي بعد ماتكملون قراءة الموضوع .

- كونـي مسئوله عن اموالك :

المفروض تكونين مسئوله عن حسابك وتعرفين ماهو  المطلوب منك تدفعينه ومتى !
يعني
اذا عندك شريك بالمصروفات مثل زوجك واجهيه بصراحه عن الاشياء اللي ممكن تشاركينه فيها وبرضاك
ولاتحملين نفسك فوق طاقتها لان كلنا نعرف ان بيننا بنات وأمهات موظفات وأهلهم أو ازواجهم
محملينهم مسئولية الصرف عالبيت
وهالشي يسلبك حقوقك يعني انتي مو مجبوره ابد تحملين نفسك عبء هو بالاصل واجب عليهم
واذا بتقولين لو مااصرف انا ماراح يهتمون
ولايصرفون بقولك لاتتنازلين عن حقك لحساب أحد واللي عليك تساعدين وبس
لكن انتبهي تحملين نفسك المسئوليه كامله
لان فيه بعض الرجال يستانس لاصارت زوجته موظفه ويحملها هم البيت
وهي ياحياتي ماتبي المشاكل وتسكت وتصرف على عيالها وبناتها
وشوي تصير تبدأ تصرف عالاكل والشرب وشوي تتحمل مصاريف السفر وغيره
اعرف وحده كانت تقول كل شوي يحملني مسئولية شي واخرتها صار يقول
اذا تبين تسافرين انتي وعيالك عطيني فلوس لان انا مايمديني هالسنه اسفركم عندي ديون !
وهو نصاب بس جاز له الوضع وصاروا على هالحاله لمدة ثلاث سنين و هي تسفرهم ع حسابها !
و انا مااعني بكلامي روحي سوي مشكله معه ووصليها للطلاق !
لان اكبر خطأ انك تسكتين وتكبتين القهر وفجأه تصحين وتقررين تنطقين !!
يعني المفروض
تفكرين بعقل وتعرفين انو انتي السبب الاول بهالوضع لانك من الاول سكتي ومايحق لك ابد
تجينه الحين وتحاسبينه ع عدم تحمله للمسئوليه لانك بالاصل انتي اللي راضيه بهالوضع وساكته !
يعني المطلوب منك تتدرجين بهالشي وحبه حبه تنسحبين من المسئوليه لما يتعود انو مسئول عن كل شي
يخص المصروفات ويعرف انو انتي لما تعطينه هالعطاء يكون برضاك وباقتناعك ومو مجبوره عليه
(اتذكر وحده بالجامعه وربي يابنات من درسنا مستوى اول بالجامعه وصرافة المكافأه مع امها
وكانت تقول لها كل شي عندك ماانتي بحاجتها !!
وعلى بالكم امها تخبيها لها للمستقبل لأ ! كانت توزعها ع اخوانها الشباب مره واحد ياخذ منها لانو بيسافر مع اصدقائه يتمشى
ولا ولدها الكبير وزوجته ناقصهم مبلغ بتأثيث بيتهم وتجمع لهم كم شهر وتقدمها مساعده لهم !
والحين تخرجت وتقول نفسي اسجل بدورات بس مامعي ماديه واذا طلبتهم قالوا يالله ع عيالنا !
شفتوا كيف الوحده لازم تكون مسئوله عن اموالها !
لان مافينا وحده تعرف وش تخبي الايام ومانضمن ان الحياة تدوم بحال واحد خصوصا احنا البنات
يعني لو انها واجهت امها من الاول وفهمتها بأدب ان مكافأتها من حقها وانها راح تعطيها مبلغ منها لانها امها اللي تحبها
كان قدرت توفر منهآ مبلغ كل شهر لو 30 ريال وقدرت بعد تخرجها تسجل بهالمبلغ بدوره تستفيد منها.

- كوني ذكيه في أمورك الماليه :
المفروض كل وحده يكون عندها معرفه لو بسيطه بالماليات يعني حتى لو كنتي ماتتحملين مسئوليه مآليه أو
ماعندك مشاريع مسئوله عنها تأكدي انك ضروري تتعلمين
وابسط مثال لاحتياجك لهالشي (حسابك البنكي)
يعني اقلها اشتري كتاب او دورات او اجلسي مع صديقه خبره وثقفي نفسك بهالمجال .
وكلنا شفنا مثال للخساره بسبب الجهل خسارة الناس بالاسهم نصهم خسروا بسبب جهل يعني اخذوا
كل ماعندهم وحطوه بالاسهم اما الناس اللي عندها وعي بهالشي خصصوا جزء من اموالهم للاسهم وباقي اموالهم
كانت باستثمارات ثانيه يعني ضروري تنتبهين بأنك ماتستثمرين اموالك كلها بشي واحد
كوني ذكيه واضمني انك لو خسرتي بشي عندك استثمارات ثانيه تعوضك خسارتك .

التخطيط المــآلي
- حددي احتياجاتك :
كثير نشوف ناس غرقانين بالديون
والسبب
(الصرف بدون مسئوليه)
والدافع لصرفهم
هو حبهم لامتلاك كل شي
من السبب وراء هالشعور ؟
هو الاعلام والصحف والتجار
يعني
- اشتري عبوتين والثالثه مجانا
طبعا هي بتشتري حتى لو ماكانت بحاجتهم الحين لانها تخاف يخلص العرض وهي مااستغلته
(مثل هالعروض حلوه بس احيانا ماتفيدنا وعلشان تعرفين انك كسبانه من العرض ولا لأ
فكري قبل تاخذين هالعبوه لو ان العرض ماكان موجود هل كنتي راح تآخذينها الحين ؟
اذا جوابك لأ فمعناه رجعيها لمكانها لان جوابك معناه انك مو بحاجتها حاليا والشي اللي ماانتي بحاجته ماله دآعي تشترينه
) .

- تخفيضات 50% عالشتوي لان دخلنا الصيف !!

طبعا بتشتري لانها تشوف العرض مغري حتى لو ان الشتاء خلص وماتحتاجه الحين بتخبيه للشتاء الجاي !
(احس الشتاء عندنا كله شهرين يعني مااحس اننا نشتري له ملابس كثيره لدرجة اننا نستغل مثل هالعروض )
- تخفيضات 50% ع كوليكشن 2010 لان كوليكشن 2011 صار بالاسواق !!
(طبعا بتشتري القديم لانو سحرتها كلمة تخفيضات وماراح تفكر تزيد المبلغ وتشتري شي جديد !)
واتوقع الاسواق بوقت التخفيضات اكبر دليل على ان عندنا اعداد كبيره يجهلون التخطيط المآلي
وان ثلاث ارباعهم يروحون للسوق ومو عارفين وش يبون ياخذون بالضبط اهم شي عندهم انها تخفيضات !
ومااعني بكلامي اني ضد عروض التخفيضات نهائيا
لان فيه عروض تحترم عقلي واتقبلها مثل عروض على
اشياء تبقى قيمتها للابد ومايجي منها موضه جديده كل فتره تفقدها قيمتها .
اتذكر وحده قالت لي انا اشتري قطنيات واشياء البسها اذا زارونا اخواتي يعني قصدها ملابس مو رسميه
وانا اشوف هالنوعيه بالاصل ارخص من القطع الرسميه وماتحتاج ننتظر عرض تخفيض عليها يعني ماتسوى زحمة التخفيضات .


طريقة التخطيط المآلي
طبعا التخطيط انواع
النوع الاول : تخطيط لصاحب او صاحبة البيت (التخطيط العائلي) :
يوزعونه ع اساسين
مصاريف ثابته او غير ثابته
الثابته مثل
- ايجار البيت .
- قسط شهري ممكن يكون لبنك او لسياره .
- راتب الشغاله او السواق .
- مصروف الابناء والزوجه .
- مصروفات للتعليم : كتب، ملابس، قسط مدارس , ادوات مكتبيه ..الخ .
- مصروفات التنقل : بنزين، صيانة سيارة، مواصلات عامة ونقل مدرسي .
- مصروفات الصحه (طبيب الاسنان , علاجات , مصاريف علاج شخص مريض بالعائله) .
- ادخا ر .
- صدقه .
هالمصروفات تحددون لها مبلغ معين كل شهر ولو مااحتجتوا المبلغ كله بهالشهر اجمعوه مع الشهور الجايه
لما تحتاجونه ووقتها تاخذون منه
مثل مصروفات الصحه مو شرط تحتاجون المبلغ كله اللي مخصصينه لهالشهر وبكذا تضيفونه
للشهور اللي بعده .
غير ثابته مثل
- فواتير ماء كهرباء هاتف البيت وجوال .
- مجموع مصاريف الاكل والشرب .
- صيانة المنزل : اضاءه , مكيفات ...الخ .
- منظفات .
- ترفيه .
- الضيافه .
طبعا في نهاية العام نأخذ نصف مبلغ الادخار ويكون مساعد لنا في المصاريف السنويه مثل مصاريف سفر
اخر العام او ترميم المنزل والنصف الباقي منه نتركه ومانسحب منه شي لوقت الحاجه
واقصد حاجه ضروريه مثل لاسمح الله لو انفصل الاب من وظيفته لاي سبب او تعب احد واحتاج علاج مكلف
وفوق امكانيات العائله لان مثل ماقلت لكم ضروري نترك عندنا شي للزمن مهما كانت الماديه ممتازه .


توزيع مصروف الأكل والشرب
شوفوا معي كيف خطتي اللي اعتمدها بمصاريف الاكل والشرب علشان توضح لكم الصوره اكثر
(طبعا باول تجربه بتنصدمون من النتيجه لكن مع الوقت راح يكون عندكم خبره بطريقة التوزيع الصح )
لان اتذكر اول مره قالت لي امي فيها انو مصروفات الاكل والشرب راح تكون مسئوليتي انصدمت
وتوهقت وماعرفت اتصرف ابد وأول شهر استلمت فيه المصروف خربطت الدنيا ورحت لامي بعد 10 ايام
وقلت خلصت المصروف وجلست امي عشر دقايق مو مستوعبه الصدمه
لاني قبل كنت من النوع اللي يمشي ويدفع وماعندي مشاكل حتى لو اطفر
لكن مع الوقت صرت اعرف كيف اشتري بذكاء وكيف اوفر بذكاء
وصرت اعرف افضل الشركات واجودها وغيره وبعد كذا زادت امي علي المسئوليه
وقالت اضفت لك مصروفات المنظفات والحمد لله صرت اوفر كل شهر من المصروفين
واعطيهم ابوي يضيفهم لمبلغ الادخار وكل شهر اوفر اكثر من اللي قبله علشان كذا
صنفوها من المصاريف غير الثابته لان كل شهر له استهلاك غير عن الثاني
والذكيه هي اللي تقدر تستغل الاشهر اللي فيها صرف قليل وتوفر منها .
بالنسبه لطريقتي انا مره سهله ومو معقده
مصروفات شهريه : يعني اشياء اشتريهم بس اول الشهر
ويشمل (الارز + اللحم + السكر +الزيت + الشاي + الملح + بهارات منوعه ) .
مصروفات اسبوعيه : اشياء اشتريهم ع حسب الاحتياج الاسبوعي
ويشمل (كل شي باستثناء اللي ذكرتهم بالمصروفات الشهريه )
لان طريقة التوفير عن طريق الشراء بالكرتون ومره بالشهر ماتنفع بعايلتنا يعني اهلي مو من النوع
اللي يعلق ع صنف واحد وهالشي ممكن يخلي اللي بالكرتون تنتهي صلاحيته وماخلص .
وفيه طريقه للتوزيع اخذتها من ملخص دوره او شي كذا بس من زمااان
لكن هالطريقه ماقدرت اوفر فيها شي وبالعكس كنت اطلب زيادة
مصروف من امي لانها لخبطتني شوي
لكن بذكرها يمكن تفيد العوائل اللي عدد افرادها قليل

المصروفات اليوميه وتكون للاشياء اللي مانشتريها الا باليوم نفسه او كل يومين
ويخصص لها مبلغ بقيمة (...) ريال باليوم
وعلشان تعرفين كم تخصصين لها بالشهر اضربي المبلغ اليومي × 30 يوم =(___) ريال بالشهر .
مثل
(الخبز بأنواعه – الزبادي – الالبان) .
المصروفات الأسبوعيه وتكون ع حسب الاحتياج الاسبوعي يخصص لها مبلغ (....)بالاسبوع
وعلشان تعرفين كم تخصصين لها بالشهر اضربي المبلغ × 4 (اللي هي عدد اسابيع الشهر)
= (__) ريال شهريا .
مثال ( ورق عنب – مكرونه – دجاج – معلبات – بيض – خضروات – فواكه – مكسرات –
بسكويت – ايس كريم - شيبسات....الخ ) .
المصروفات الشهريه يخصص لها مبلغ شهري قيمته (....) ريال بالشهر واكيد نضرب هالمبلغ في 1
لانها تكون مره وحده وللشهر كله >احلفي
مثال (أرز – لحوم – بهارات طعام – كاتشب – مايونيز – صلصات –
زيت – قهوه – شاي – بهارات القهوه – حليب – ملح – سكر – معجون طماطم –
مقادير حلويات – مقادير فطائر ...الخ ) .

اما مصروف المنظفات ياملحه مايحتاج تخطيط ولا حوسه
يعني اكتبها كلها بورقه واروح اشتريهم مره وحده بداية الشهر
وبكميات تكفي الشهر كامل لان ماله داعي كل اسبوع اروح مشوار
علشان اشتريهم واصلا احب هالطريقه لانو غالبا يكون عليها عروض واستفيد منها .
النوع الثاني - تخطيط شخصي :
اكتبي بورقه احتياجاتك وبعدها تقسيم لمصروفك الشهري بالنسبه المئويه
بكتب لكم تقسيمي لمصروفي الشهري ع حسب احتياجاتي
وكل وحده تقدر تغير ع حسب احتياجاتها .
10 % صدقه .
10 % توفير (مااسحبها من رصيدي)
10 % هديه بسيطه جدا لجدتي او امي او ابوي او لأي أحد يهمني .
10 % كتب .
60 % هالستين للملابس والشنط والجزم والاكسسوار و لمنتجات العنايه
والنظافه و لغرفتي و للمكياج والعطور وللكوافير يعني ع حسب احتياجي وقتها
اختار منهم شي واروح اشتريه .
وبتقولون وش فايدة توزيعنا لمصروفاتنا الشخصيه ؟
- راح تتعلمين انو ماتسرفين ولا تشترين شي ماانتي بحاجته لانك بتشوفين بعيونك
وش كثر كنتي تضيعين فلوسك ع اشياء ماتسوى .
- ماراح تروحين للسوق الا وانتي عارفه وش تبين بالضبط
يعني بتروحين ومعك ميزانيه تكفي حاجتك من السوق هالشهر .
- ماراح تتأثرين لا بتخفيضاتهم ولا بعروض اللي يبيعون وبثارتهم .
بقولكم موقف صار مع اختي اللي اصغر مني ..
مره رحت معها ع اساس بتشتري شنطه ومقشر للجسم ونرجع بسرعه
لان اخوي وقتها كان عنده شغل ومستعجل المهم اخذت شنطه
وقلت لها بنتظرك هنا وانتي اشتري مقشر وتعالي المهم احتريتها 5 دقايق 10 الى ربع ساعه
ولما جت الا معها اكياس مو وحده انا تنحت بس سكت
المهم لما رجعنا للبيت وجلست تطلع الاغراض قالت وععع وش هذا مااطيق ريحته
وشوي قالت وش هالليفه مااطيقها وشوي قالت هالكريم مره غبي مااطيقه
قلت لها يؤ اجل ليه اخذتيهم قالت هو ازعجني فوق راسي شوفي وشوفي وانا تفشلت بالمحل
احرجني قدام الناس ومابي افشله وعلشان اسكته اخذتهم وطلعت
شفتوا كيف احنا مسكينات واللي كسبانين هالتجار !
لو انو اختي محدده ميزانيتها وموزعتها صح كان اخذت معها للسوق اللي يكفيها وبس
وكان عرفت انها هالشهر مو بحاجة اشياءه اللي يبيها تاخذها وقدرت تقاطعه وتقول له
شكرا بس لو سمحت حاسب انا مستعجله !
واتحداه ينطق حرف بعدها !
....
بنهاية الموضوع حابه اوضح نقطتين مهمه :
( لا احد يتحمس بالتوفير ويوصل لدرجة البخل يعني اللي نبيه هو التوفير من المبالغ الزايده عن الحاجه وبس )
(انتبهي تروحين السوبر ماركت مع اطفالك او اخوانك
لان هالشي راح يزيد قيمة الفاتوره اضعاف
(اسألوا مجربه مره اخذت اخوي الصغير ولما شفت الفاتوره كرهت نفسي لوول ) .
وراح احكي عن التخطيط المالي وتأثيره عالاطفال بموضوع خاص للاطفال
( ياكثر المواضيع اللي اجهزها وماخلصت )
......
طبعا كلامي ووجهة نظري بالموضوع
كانت مختلفه تماما عن وجهة نظري قبل قراءتي
لكتب مترجمه وملخص دورات عن الذكاء المالي والتخطيط المالي
لاني كنت اكبر مسرفه واحب اتسوق كثير واشتري اشياء مالها داعي
وكان عادي عندي ادفع مبلغ كبير على شي مافيه امل البسه
حتى لو اني ادري اني بطفر بعده
يعني صدقوني الوحده مهما كانت مسرفه لما تجرب الترتيب والتخطيط لكل شي
راح تحب هالشي وراح تشوف فيه متعه وراحه وراح تعرف مع التكرار
انو هالشي اسلوب حياة وابعد مايكون عن التقييد
لان واجهت كثير اشخاص كانوا يسمون هالشي تعقيد وتقييد للحريه لانو ماشي ع نظام معين !!

بحفظ الرحمن

هناك تعليقان (2): Leave Your Comments

  1. صباح الخير يا عزيزتى
    مدونتك جميلة أعجبتنى
    الموضوع دة مهم جدا و لو أن الرجال فى الغالب يتهمون النساء بالمادية لو تكلمت فى موضوع مشاركتها فى مصروف البيت و الحل زى ما قلت هو وضع القواعد و التدرج فى تنفيذها بدون مناقشات حادة
    و لابد كل واحدة يكون عندها مدخرات تخصها للزمن مهما كانت العلاقة بينها و بين زوجها جيدة فهكذا تقول تجارب البشر الناس يتغيرون و إذا لم يتغيروا فلا أحد يضمن إلى متى ستمتد حياته
    تحياتى لك

    ردحذف
  2. صباحك وردشهرزادشكرالك هذا من طيبك
    صحيح اختي كلامك صحيح اهم شي التعاون لانه سر النجاح كما يقول المثل يد واحدة لاتصفق وشوي من الحكمة والتعقل في صرف الفلوس راح اكيد يذخرون مبلغ مهم ينفعهم مستقبلا

    ردحذف


ملآحظه لزوآر مدونتي : مفتوح التعليق للجميع بالضغط على اختيار الهويه غير معروف